Azərbaycan Respublikası Dövlət Neft Şirkətinin mətbuat xidmətindən verilən məlumata görə, 2010-cu ilin sentyabr ayında şirkət ölkənin təbii qaz təchizatı sisteminə 881 milyon 66 min kubmetr "mavi yanacaq" vermişdir.
Yeraltı qaz anbarlarına 260 milyon 54 min kubmetr təbii qaz vurulmuşdur. Sentyabrda 621 milyon 12 min kubmetr qaz istifadə olunmuşdur. Bunun 527 milyon 120 min kubmetri sənaye, əhali və "Azərenerji" ASC-nin istifadəsinə verilmiş, 14 milyon 345 min kubmetri Gürcüstana, 60 milyon 614 min kubmetri Rusiyaya ixrac olunmuş, 18 milyon 933 min kubmetri Naxçıvan MR-in qaz təminatı üçün İrana ötürülmüşdür.
Şirkət cari ilin 9 ayında Azərbaycanın yanacaq-enerji balansında təbii qazın təhvili üzrə nəzərdə tutulmuş öhdəlikləri artıqlaması ilə yerinə yetirmişdir. Belə ki, yanvar - sentyabrda ARDNŞ ölkənin təbii qaz təchizatı sisteminə 8 milyard 365 milyon 780 min kubmetr "mavi yanacaq" vermişdir. Bu, proqnozda nəzərdə tutulandan 704 milyon 280 min kubmetr çoxdur. Bundan başqa, ölkə sənayesinin, əhalinin təbii qazla tam təmin olunması və xaricə qazın ixracı ilə bağlı imzalanmış müqavilə öhdəliklərinin yerinə yetirilməsi məqsədi ilə yeraltı qaz anbarlarından 638 milyon 680 min kubmetr "mavi yanacaq" götürülmüşdür. Bununla yanaşı, yeraltı qaz anbarlarına əlavə olaraq 1 milyard 312 milyon 982 min kubmetr qaz vurulmuşdur.
Beləliklə, 2010-cu ilin yanvar - sentyabrında 7 milyard 691 milyon 478 min kubmetr qaz istifadə olunmuşdur. Bu həcmdən sənaye, əhali və "Azərenerji" ASC-nin istifadəsinə 6 milyard 562 milyon 496 min kubmetr təbii qaz verilmiş, Gürcüstana 247 milyon 355 min kubmetr, Rusiyaya 618 milyon 5 min kubmetr qaz ixrac olunmuş, Naxçıvan MR-in qaz təminatı üçün isə İrana 263 milyon 622 min kubmetr "mavi yanacaq" ötürülmüşdür.