Oktyabrın 7-də Kiyevdə iqtisadi əməkdaşlıq üzrə Azərbaycan-Ukrayna hökumətlərarası birgə komissiyasının VIII iclası keçirilmişdir.
Azərbaycanın və Ukraynanın hökumət rəsmilərinin iştirakı ilə keçirilən iclası Ukrayna Baş nazirinin birinci müavini Andrey Klyuyev açaraq beynəlxalq arenada strateji müttəfiqlər kimi tanınan Azərbaycan və Ukrayna arasında bir çox sahələrlə yanaşı, iqtisadi-ticari əlaqələrin dinamik inkişafından söz açmışdır.
Ukraynada hökm sürən iqtisadi böhranla əlaqədar son 4 ildə hökumətlərarası müştərək komissiyanın iclasının keçirilməsində fasilə yaranmasından təəssüfləndiyini bildirən Andrey Klyuyev rəsmi Kiyevin Azərbaycan ilə Ukrayna arasında iqtisadi-siyasi əlaqələrin inkişafına xüsusi önəm verdiyini vurğulamışdır.
Dünyada hökm sürən maliyyə böhranına baxmayaraq, son illər Azərbaycan ilə Ukrayna arasında mal dövriyyəsinin 2,5 dəfə artdığını nəzərə çatdıran Azərbaycan Respublikası Baş nazirinin birinci müavini Yaqub Eyyubov hökumətlərarası birgə komissiyanın 2010-2015-ci illəri nəzərdə tutan yeni əməkdaşlıq proqramına əsasən qarşılıqlı iqtisadi-ticari əlaqələrin daha da inkişaf edəcəyinə əminliyini vurğulamışdır.
İclasda Azərbaycan və Ukrayna arasında energetika, nəqliyyat, gömrük, dəmir yolu, kənd təsərrüfatı, səhiyyə, metallurgiya, hərbi-texniki əməkdaşlıq və iqtisadiyyatın müxtəlif sahələrini əks etdirən məsələlər geniş müzakirə olunmuşdur.
İclasın sonunda Azərbaycan-Ukrayna hökumətlərarası birgə komissiyanın VIII iclasının protokolu imzalanmışdır.
Birgə komissiyanın həmsədrləri Yaqub Eyyubov və Andrey Klyuyev iclas çərçivəsində müzakirə olunan məsələlər haqqında jurnalistləri maraqlandıran sualları cavablandırmışlar.

Zeynal AĞAZADƏ AzərTAc-ın xüsusi müxbiri
Kiyev