Zaqatala şəhərindəki "Qafqaz" hotelində ABŞ-ın Beynəlxalq İnkişaf Agentliyinin özəl sektorunun Rəqabətliliyin gücləndirilməsi proqramı layihəsi çərçivəsində II Balıqçılıq konfransı keçirilmişdir. Konfransda Beynəlxalq İnkişaf Agentliyinin Azərbaycan üzrə İqtisadiyyat bölməsinin rəisi ŞilaYanq, ABŞ, Böyük Britaniya, Hollandiya, Türkiyə və Gürcüstandan olan 6 nəfər beynəlxalq ekspert, Azərbaycanın iri balıqçılıq təsərrüfatlarının rəhbərləri, Milli Elmlər Akademiyası Zoologiya İnstitutunun əməkdaşları iştirak etmişlər.
Konfransı giriş sözü ilə açan Zaqatala Rayon İcra Hakimiyyəti başçısının aqrar məsələlər üzrə müavini İlkin Şəfizadə qonaqları salamlamış və konfransın işinə uğurlar arzulamışdır. Natiq öz çıxışında Azərbaycan Respublikasının Prezidenti cənab İlham Əliyevin prioritet inkişaf sahəsi elan etdiyi və daim diqqət və qayğı göstərdiyi aqrar sahənin inkişafı üçün dövlət yardımlarının ildən-ilə artırıldığını qeyd etmiş, "2008-2015-ci illərdə Azərbaycan Respublikasında əhalinin ərzaq məhsulları ilə etibarlı təminatına dair Dövlət Proqramı"nın yerlərdə uğurlu icra olunması ölkəmizin ərzaq təhlükəsizliyinin təmin olunmasına və eyni zamanda balıqçılığın da gələcək kompleks inkişafına zəmin yaratdığını xüsusi vurğulamışdır. Daha sonra o, rayon ərazisində fəaliyyət göstərən balıqçılıq təsərrüfatları , həmin təsərrüfatlarda yetişdirilən balıq cinsləri və sair barədə konfrans iştirakçılarını məlumatlandırmış, gələcəkdə balıq istehsalı həcmini daha da artırmağa imkanların olduğunu bildirmişdir. Daha sonra konfransda "Karp yetişdirmə təcrübələri", "Forel yetişdirmə təcrübələri", "Balıq yemləmə təcrübələri" və sair mövzularda ekspertlərin çıxışları dinlənilmiş və konfrans iştirakçılarının sualları cavablandırılmışdır. Üç gün davam edəcək konfransda yerli balıqçılıq təsərrüfatlarına baxış, Zaqatalada karp inkubatorun açılışı, Şəkidə balıq yemi dəyirmanının açılışı və sair tədbirlər nəzərdə tutulmuşdur.

İ.MUSAOĞLU, "Xalq qəzeti"nin bölgə müxbiri