Azərbaycan həm neft-qaz ixracatçısı, həm də tranzit ölkə kimi Avropanın enerji təhlükəsizliyinin təmin edilməsində böyük rol oynayır. Bu fikri Vaşinqtonda fəaliyyət göstərən Strateji Araşdırmalar Mərkəzinin enerji və milli təhlükəsizlik proqramının eksperti Edvard Çou oktyabrın 7-də Bakıda keçirdiyi mətbuat konfransında demişdir.
Azərbaycanın enerji sektorundakı inkişaf prosesləri ilə tanış olmaq və bu istiqamətdə müzakirələr aparmaq üçün Bakıya gəldiyini deyən E.Çou son illər ərzində ölkəmizdə gedən dinamik inkişafı yüksək qiymətləndirmişdir.
Ölkəmizin "Cənub dəhlizi" layihəsinin reallaşmasındakı rolunu xüsusi vurğulayan qonaq "Azərbaycan-Gürcüstan-Rumıniya İnterconnector" (AGRİ) layihəsinin Avropanın enerji təhlükəsizliyinin təmin olunması və regional əməkdaşlığın möhkəmlənməsinə töhfə verəcəyini demişdir. Azərbaycanın təşəbbüsü ilə həyata keçirilən böyük enerji layihələri bütövlükdə region üçün mühüm əhəmiyyətə malikdir.
Amerikalı ekspert, həmçinin Azərbaycan Respublikası Dövlət Neft Şirkəti (ARDNŞ) ilə bp şirkəti arasında Xəzər dənizinin Azərbaycan sektorunda yerləşən "Şəfəq-Asiman" perspektiv strukturunun birgə geoloji kəşfiyyatı və işlənməsi haqqında hasilatın pay bölgüsü sazişinin imzalanmasının əhəmiyyətinə də toxunmuşdur.
AzərTAc{nl}