Ölkəmizin yeraltı qaz anbarlarında növbəti payız-qış mövsümünə hazırlıq işləri yüksək səviyyədə davam etdirilir. Xatırladaq ki, Azərbaycan Respublikasının Prezidenti İlham Əliyev hələ bir neçə il bundan əvvəl ölkə iqtisadiyyatının və əhalinin payız-qış aylarında təbii qaza olan tələbatının davamlı təminatı və ixrac imkanlarının genişləndirilməsi məqsədi ilə SOCAR qarşısında yeraltı qaz anbarlarının aktiv tutumunun artırılması kimi mühüm bir vəzifə qoymuşdur.

Hazırda dövlət başçısının tapşırığından irəli gələn vəzifələri  təxirə salınmadan və yüksək keyfiyyətlə yerinə yetirilməsi istiqamətində konkret tədbirlər həyata keçirilir. Bu baxımdan növbəti payız-qış mövsümü üçün SOCAR-ın “Qaradağ” və “Qalmaz” qaz anbabarlarına təbii qazın vurulması ilə bağlı işlər diqqəti cəlb edir.

Xatırladaq ki, bu proses mövcud qrafikə uyğun olaraq aprel ayından başlanılmışdır və cari ilin noyabr ayında sona çatdırılacaqdır. Cari il mayın 20-nə kimi anbarlara ümumilikdə 338 milyon 754 min kubmetr qaz vurulmuşdur ki, bunun da 186 milyon 205 min kubmetri “Qalmaz”, 152 milyon 549 min kubmetri isə “Qaradağ” qaz anbarlarının payına düşmüşdür. Mövsümün sonuna kimi qaz anbarlarına ümumilikdə 2,5 milyard kubmetr qazın vurulması proqnozlaşdırılır.

Hazırda “Azneft” İstehsalat Birliyi Qaz Anbarları İstismarı İdarəsinin istismar etdiyi yataqlarda qazma və təmir işləri də uğurla davam etdirilir. Bu yaxınlarda “Qaradağ” yatağında vurulan və götürülən qaz həcmlərinin artırılması məqsədi ilə 485 nömrəli istismar-basqı quyusunda qazma işlərinə başlanılmışdır. Qaz Anbarları İstismarı İdarəsinin sifarişi ilə Kompleks Qazma İşləri Tresti tərəfindən məhsuldar qatın VII A horizontuna qazılan quyunun layihə dərinliyi 3100 metrdir. 486 nömrəli quyuya isə sutka ərzində 100 min  kubmetr qazın vurulacağı nəzərdə tutulur.

Mirbağır YAQUBZADƏ,
“Xalq qəzeti”