Oktyabrın 5-də Azərbaycan Respublikası Auditorlar Palatasında Avropa Mühasibat və Auditorlar Federasiyasının (EFAA) icraçı direktoru Federiko Diomeda ilə görüş olmuşdur.
Maliyyə və Vergilər nazirlikləri, Mərkəzi Bank, Qiymətli Kağızlar üzrə Dövlət Komitəsi, Hesablama Palatası, Maliyyə Monitorinqi Xidməti, Sahibkarlar (İşəgötürənlər) Təşkilatları Milli Konfederasiyası və GRBSo Tədris Mərkəzi təmsilçilərinin də iştirak etdikləri görüşdə palatanın sədri professor Vahid Novruzov qurumun fəaliyyəti, EFAA ilə əməkdaşlıq barədə danışmışdır.
V.Novruzov qeyd etmişdir ki, 1994-cü ildə yaradılmış EFAA milli mühasib və auditorlar qurumlarını özündə birləşdirir. Qurumun, həmçinin Avropa İttifaqı, bütövlükdə Avropa daxilində kiçik və orta müəssisələrə peşəkar xidmət göstərən fərdi üzvləri vardır. Azərbaycan 200 mindən artıq mühasib və auditorun təmsil olunduğu bu təşkilatın 12 üzvündən biridir və üzərinə düşən öhdəlikləri layiqincə yerinə yetirir.
V.Novruzov qonağa ölkəmizdə aparılan iqtisadi islahatlar nəticəsində qazanılmış uğurlar haqqında ətraflı məlumat vermişdir.
Federiko Diomeda Azərbaycanda biznesin və sahibkarlığın inkişafına böyük diqqət yetirilməsindən məmnunluğunu bildirmiş, biznesin inkişafında kiçik və orta müəssisələrin, iqtisadi həyatda auditlərin rolunu vurğulamışdır.
Tədbir dialoq şəklində davam etmiş, iştirakçıları maraqlandıran suallar cavablandırılmışdır.{nl}