Dünyanın neft sənayesi tarixində ilk dəfə olaraq açıq dənizdə neftçıxarmanın əsası qoyulduğu “Neft Daşları” yatağında ehtiyatlar hələ çoxdur. İndi həmin ehtiyatların istismara cəlb edilməsi istiqamətində zəruri tədbirlər həyata keçirilir, yeni stasionar dəniz özülləri və estakadayanı meydançalar  inşa olunur, köhnə infrastruktur əsaslı şəkildə yeniləşdirilir.

Hazırda burada  “Azneft” İstehsalat Birliyinin sifarişi əsasında yeni estakadayanı meydançanın tikintisi uğurla davam etdirilir. Xatırladaq ki, “Neftqazelmitədqiqatlayihə” İnstitutunun layihəsi əsasında inşa olunan 1637A saylı estakadayanı meydançanın baş podratçısı “Neftqaztikinti” Trestidir.

14 istismar quyusunun qazılması üçün nəzərdə tutulan estakadayanı meydança dənizin 21,5 metr dərinliyində yerləşdiriləcək. Burada qazılacaq quyuların hər birindən sutkada 10 ton neft hasil olunacağı gözlənilir. Layihə çərçivəsində indiyə kimi 6 ədəd blok, 7 ədəd aralıq seksiyası, 2 ədəd minik meydançası, 3 ədəd yanalma meydançası inşa olunub. Yanğın əleyhinə su kəməri (dəniz suyu), içməli su kəməri və yanacaq boru kəmərinin çəkilişi isə davam etdirilir. Dəmir-beton plitələrin, qülləaltı postamentin, yükqaldırma qabiliyyəti 13,5 ton olan hidroaktiv kranın, eyni zamanda, istehsalat zamanı və yanğına qarşı su təchizatını təmin etmək məqsədilə 4 ədəd elektrik dalma nasosunun və 2 ədəd lafet qülləsinin quraşdırlıması nəzərdə tutulur.

Estakadayanı meydançada ətraf mühitin mühafizəsi, təhlükəsizlik texnikası, yanğından mühafizə sahələri üzrə işlər bütün müasir norma və tələblər səviyyəsində yerinə yetirilir. Dənizin çirklənməsinin qarşısını almaq üçün  meydançanın döşəməsində novlar, döşəmənin altında isə çirkab suları yığmaq üçün tutumlar yerləşdirilmişdir. Yeni meydançanın tikintisinin bu ilin iyun ayında başa çatdırılacağı gözlənilir.

M. YAQUBZADƏ,
“Xalq qəzeti”