Azərbaycanın Xarici İşlər Nazirliyinin mətbuat xidmətindən bildirmişlər ki, xarici işlər nazirinin müavini Xələf Xələfov ölkəmizdə səfərdə olan Mərakeş Krallığı Parlamenti Nümayəndələr Palatasının sədri Abdelvahed Radinin başçılıq etdiyi nümayəndə heyəti ilə görüşmüşdür.
Azərbaycan ilə Mərakeş arasında siyasi dialoqun uğurla aparıldığını deyən X.Xələfov bildirmişdir ki, ikitərəfli iqtisadi münasibətlərin inkişafı üçün geniş potensial mövcuddur. Nazir müavini əməkdaşlığın genişləndirilməsi üçün müştərək hökumətlərarası iqtisadi komissiyanın ilk iclasının keçirilməsinin vacibliyini də vurğulamışdır.
A.Radi Dağlıq Qarabağ münaqişəsi ilə bağlı Azərbaycanın ədalətli mövqeyinin Mərakeş tərəfindən dəstəkləndiyini və bunun gələcəkdə də davam edəcəyinə əmin olduğunu demişdir. O, Azərbaycan ilə Mərakeş arasında dini və tarixi köklərə əsaslanan mədəni əlaqələrin mövcud olduğunu qeyd etmişdir.
Nümayəndələr Palatasının sədri Mərakeşdə 2010-cu ilin oktyabrında keçirilməsi planlaşdırılan Azərbaycan mədəniyyəti günlərinin ölkələrimiz arasında mədəni əlaqələrin daha da möhkəmlənməsinə öz töhfəsini verəcəyinə inandığını vurğulamışdır.
AzərTAc{nl}