Sentyabrın 28-də Azərbaycan Respublikasının Baş naziri Artur Rasizadə ölkəmizdə işgüzar səfərdə olan Rusiya Federasiyasının Miqrasiya Xidmətinin direktoru, general-polkovnik Konstantin Romodanovskini onun xahişi ilə qəbul etmişdir.
Bu barədə Nazirlər Kabinetinin mətbuat xidmətindən məlumat verilmişdir. Tərəflər qeyd etmişlər ki, son vaxtlar MDB ölkələri arasında miqrasiya xidmətinə dair zəruri hüquqi bazanın yaradılması istiqamətində aparılan işlər müstəqil dövlətlər daxilində miqrasiya siyasətinin qurulmasına və bu mürəkkəb prosesin tənzimlənməsinə kömək edir. Ona görə də miqrasiya məsələləri həm də ölkələrin iqtisadi inkişafına yardım baxımından dəyərləndirilərək əməkçi miqrantlarla işin düzgün təşkilinə, sosial müdafiələrinə böyük diqqət yetirilir.
Xüsusilə əməkçi miqrantların və onların ailə üzvlərinin hüquqi statusuna dair zəruri sənədlərin hazırlanmasının MDB məkanında bu sahədə vəziyyətin daha da yaxşılaşmasına səbəb olacağı vurğulanmışdır. Söhbət zamanı qeyri-qanuni miqrantlarla iş və insan alverinə qarşı mübarizə metodlarının nizamlanması məsələlərinə də toxunulmuşdur.
Görüşdə Azərbaycanla Rusiya Federasiyası arasında miqrasiya proseslərinin tənzimlənməsinə dair tərəfləri maraqlandıran bir sıra digər məsələlər ətrafında da geniş fikir mübadiləsi aparılmışdır.