Sentyabrın 29-da İstanbulda başlayacaq Qara dəniz enerji və iqtisadiyyat forumunda Xəzər hövzəsindəki neft və qaz resurslarının Qərb bazarlarına daşınması və Avrasiya məkanındakı ölkələr arasında enerji sahəsindəki əməkdaşlığın gücləndirilməsi məsələləri müzakirə olunacaqdır.
Bununla bağlı jurnalistlərə məlumat verən forumun təşkilatçısı ABŞ-ın Atlantika Şurası Avrasiya bölməsinin direktoru, Birləşmiş Ştatların Azərbaycan və Türkiyədəki keçmiş səfiri Ross Uilson bildirmişdir ki, tədbirdə Türkiyənin Baş naziri Rəcəb Tayyib Ərdoğan, ABŞ dövlət katibinin Avrasiya enerji məsələləri üzrə xüsusi nümayəndəsi Riçard Morninqstar, istefada olan general Brent Skoukroft, keçmiş dövlət katibi Zbiqnev Bzejinski də iştirak edəcəklər.
Məlumat verilmişdir ki, "Nabukko", Türkiyə-Yunanıstan-İtaliya, Transadriatik boru kəmərləri və Azərbaycan-Gürcüstan-Rumıniya (AGRİ) təbii qaz layihələri bu forumda müzakirə olunacaq mövzulardandır. Tədbirdə, həmçinin 2011-ci ildə Azərbaycanda hasil olunacaq böyük həcmdə təbii qazın nəqli üçün yeni mexanizmlərlə bağlı qərarlar qəbul olunacaqdır, çünki, "Nabukko" layihəsinin həyata keçməsi üçün "Şahdəniz" qazı ən mühüm amildir. Azərbaycan 1,2 trilyon kubmetr qaz ehtiyatlarına malikdir və "Şahdəniz - 2" layihəsi çərçivəsində hasilat 2016-cı ildə başlayacaqdır. "Nabukko" konsorsiumu isə bu zamanadək Azərbaycan və İraq qazı hesabına fəaliyyət göstərə bilər.
Amerikalı diplomat bölgədə enerji layihələrinin həyata keçirilməsinə əngəl olan amillər sırasında son aylar Birləşmiş Ştatların Azərbaycan və Türkiyəyə səfir təyinatlarının həyata keçirilməməsini də göstərmişdir.

Oqtay BAYRAMOV AzərTAc-ın xüsusi müxbiri
Ankara