Cənub bölgəsinin elektrik enerjisinə olan tələbatının ödənilməsində mühüm rol oynayan "Şirvan Yüksək Gərginlikli Elektrik Şəbəkəsi"ndə texniki göstəricilərin daha da dayanıqlı vəziyyətdə fəaliyyətinin təmin edilməsi məqsədilə cari və əsaslı təmir işləri yerinə yetirilib.
"Azərenerji"ASC-nin mətbuat xidmətindən aldığımız məlumata görə, şəbəkə Masallı, Lənkəran, Astara, Lerik, Yardımlı , Cəlilabad , Biləsuvar, Neftçala, Salyan, Hacıqabul və Qaradağ rayonunun Ələt qəsəbəsinin inzibati ərazisində yerləşən elektrik verilişi xətlərinə və yarımstansiyalarına xidmət edir.
Bu rayon və qəsəbələrdəki istehlakçıların davamlı elektrik enerjisi ilə təminatı şəbəkənin ən ümdə tapşırıqlarından biri olduğu üçün şəbəkə üzrə "Şirvan", "Sabirabad", "Qazıməmməd" və s. hava elektrik verilişi xətlərində müxtəlif təyinatlı təmir-bərpa işləri aparılıb. Təmir işlərinə izolyatorların dəyişdirilməsi, xətlərin əsaslı təmiri, xətt armaturlarının quraşdırılması və dayaqların yeniləri ilə əvəz edilməsi daxildir.
"Salyan", "Sabirabad", Udulu", "Bankə", "Cəlilabad", "Göytəpə" və digər müvafiq yarımstansiyalarda isə müxtəlif gücə malik transformatorlar əsaslı və cari təmir edilərək normal iş rejiminə gətirilib. Şəbəkə üzrə 22 kilometrə yaxın məsafədə 10/6 kilovoltluq elektrik verilişi xətləri yenidən quraşdırılıb.
Şəbəkənin xidmət etdiyi inzibati ərazi vahidləri üzrə 404 ədəd 10-6 kilovoltluq transformator yarımstansiyalarında əsaslı və cari təmir işləri yerinə yetirilib.
Yenidənqurma işləri ilə əlaqədar olaraq smart-kart tipli sayğacların quraşdırılması məqsədilə 74 kilometrdən artıq koaksial kabel quraşdırılıb. Bundan əlavə , 93 kilometrə yaxın 0,4 kilovoltluq elektrik verilişi xətti "SİP" kabelləri ilə əvəz edilib.

Qəzənfər QASIMOV, "Xalq qəzeti"