Azərbaycanda neft sənayesinin infrastruktur imkanlarının artırılması istiqamətində tədbirlər davam etdirilir.

 Bu günlərdə “Günəşli” yatağında qazlift kompressor stansiyasının tikinti-quraşdırma işləri uğurla başa çatdırılıb. Xatırladaq ki, sözügedən obyekt “Azneft” İstehsalat Birliyinin 28 May adına Neft Qazçıxarma İdarəsinin sifarişi əsasında tikilib. Yeni stansiya “Günəşli” yatağında neft verən quyuların uzunmüddətli qazlift üsulu ilə istismarını təmin etməklə yanaşı, yataqdakı platformalarda qazlift sistemini tənzimləyəcək, eləcə də atmosferə atılan qazların yığılaraq nəql olunmasını təmin edəcək.

Dənizin 87 metr dərinliyində quraşdırılmış stansiyanın məhsuldarlığı gündə 3 milyon kubmetr təşkil edir. Stansiyada hər birinin çəkisi 3 min ton olan piramida tipli iki dayaq blokundan ibarət stansiyada 8 ədəd kompressor, 2 ədəd hava soyuducusu, 12 ədəd qaztənzimləyici, quruducu, hava qəbuledicisi, 1 ədəd dizel mühərrikli generator, 2 ədəd transfarmator quraşdırılıb. Bundan əlavə, burada 12 ədəd idarəetmə otağı, daşıyıcı göyərtə, 4 ədəd metal lövhə və həmin lövhələr üzrə müxtəlif diametrli boru xətləri quraşdırılıb, svaylar vurulub.

Xatırladaq ki, 2009-cu ildən inşasına başlanılmış stansiyada tikinti-quraşdırma işləri “Neftqaztikinti” Trestinin 3 saylı Tikinti-Quraşdırma İdarəsi tərəfindən həyata keçirilib.

M. YAQUBZADƏ,

“Xalq qəzeti”