Sentyabrın 17-19-da ABŞ-Asiya Biznes Forumunun təşkilatçılığı ilə Los-Anceles şəhərində geniş sərgi, forum və seminarlar keçirilmişdir. Sərginin açılışında Los-Anceles şəhərinin meri Antoni Villarayqoza, Asiya ölkələrinin ABŞ-dakı diplomatik nümayəndəliklərinin başçıları və digər rəsmi şəxslər iştirak etmişlər.
Üç gün davam edən sərmayə forumlarında, sərgidə iştirak edən Asiya ölkələrinin Los-Ancelesdəki baş konsulluqlarının və ticarət palatalarının əməkdaşları ölkələri haqqında məlumatlar vermiş, Asiya və ABŞ-da fəaliyyət göstərən xarici şirkətlər isə öz məhsul və xidmətlərini nümayiş etdirmişlər.
Azərbaycan Respublikası İqtisadi İnkişaf Nazirliyi, AZPROMO, ABŞ-Azərbaycan Ticarət Palatasının dəstəyi ilə sərgidə iştirak edən ölkəmizin Los-Ancelesdəki baş konsulluğu tərəfindən respublikamızın tarixi, mədəniyyəti, coğrafiyası, iqtisadiyyatı, həyata keçirilən layihələr və biznes imkanları barədə ətraflı məlumat verilmiş, müxtəlif sahələri əhatə edən kitab və bukletlər paylanılmışdır.{nl}

Şəfəq AKİFQIZI AzərTAc-ın xüsusi müxbiri
Los-Anceles