2014-cü ilin yanvar-oktyabr aylarında ABŞ Azərbaycandan 373 min barel neft məhsulları idxal etmişdir. 2013-cü ilin analoji dövründə bu göstərici 336 min barel təşkil etmişdir. Bu barədə Trend ABŞ-ın Dövlət Enerji İnformasiya İdarəsinə (EIA) istinadən məlumat vermişdir.

Oktyabrda ABŞ cəmi 14 min barel neft məhsulları idxal edib. 2013-cü ilin oktyabrında isə bu göstərici 30 min barel idi.

Məlumata görə, idxal edilmiş məhsulların bütün həcmi neft-kimya sənayesində xammal kimi istifadə olunan naftanın payına düşür.

2009-cu ildən davam edən uzunmüddətli fasilədən sonra ABŞ inişil Azərbaycandan neft məhsullarının tədarükünü bərpa etmişdir. 2008-ci ildə ABŞ-a Azərbaycandan 308 min barel  neft məhsulları tədarük olunmuşdur.

Qeyd edək ki, Azərbaycanda neft məhsulları iki neft emalı zavodunda (NEZ) istehsal olunur. Həmin zavodların ümumi gücü ildə 16 milyon ton təşkil edir. Hər iki zavod ARDNŞ-nin balansındadır. Bu yaxınlarda “Azneftyağ” NEZ ləğv edilərək Heydər Əliyev adına neft emalı zavodunun tərkibinə daxil edilmişdir.