Moskva birjasında rublun avro və dollar qarşısında rekord enişi dünən səhər saatlarında qeydə alınıb. KİV-in məlumatına görə, dollar təxminən 60 rubl, avro isə 68 rubla çatıb. Amma bir qədər sonra Mərkəzi Bankın müdaxiləsi ilə rus pulu dəyərini cüzi də olsa, artıra bilib. Amma yenə də dollar 54, avro 67 rubldan yüksəkdir.

Moskva Fond Birjasının nümayəndəsi Nikita Bekasov deyib ki, rubl neftin qiymətinə qarşı çox həssasdır. Onun sözlərinə görə, neft ucuzlaşan kimi rublun məzənnəsi də aşağı düşür. Bekasov deyib ki, biz rublun dollar və avro qarşısında ən sürətli enişini müşahidə etdik. Son günlər milli valyutanın maksimum enişi yeniləndi.

Artıq hökumət vəziyyəti tənzimləmək üçün fəal addımlar atmağa başlayıb. Dekabrın ilk günü Mərkəzi Bank dövriyyədən 700 milyon dollar həcmində vəsait alıb. Amma ekspertlər bu addımların kifayət etmədiyini və ixtisarların qaçılmaz olduğunu deyirlər.

İqtisadçı Vladimir Tixomirov deyib ki, hökumət gələn ilin ilk rübündə büdcəyə yenidən baxacaq. Ən əsası isə bəzi xərclər ixtisar ediləcək ki, büdcə balanslı olsun. O, büdcənin kəsir riskinin çox böyük olduğunu və bunun ehtiyat fondu hesabına bağlana biləcəyini deyib.

Mahmud QƏRİBOV,
 “Xalq qəzeti”