“XXI əsrdə sənayeləşmə: Sənaye siyasətində əsas trendlər, müasir yanaşma və təcrübələr” mövzusunda beynəlxalq sənaye konfransında iştirak etmək üçün Bakıda səfərdə olan İran İslam Respublikasının Sənaye, Mədən və Ticarət naziri Məhəmməd Rza Nemətzadənin başçılıq etdiyi nümayəndə heyəti Azərbaycan Respublikasının İqtisadiyyat və Sənaye naziri Şahin Mustafayev ilə görüşüb.

İqtisadiyyat və Sənaye Nazirliyindən AzərTAc-a bildiriblər ki, İranın rəsmi şəxslərindən və sənayenin müxtəlif sahələrində fəaliyyət göstərən iş adamlarından ibarət nümayəndə heyəti ilə keçirilən görüşdə ölkələrimiz arasında iqtisadi əlaqələrin mövcud vəziyyətinə və inkişaf perspektivlərinə dair fikir mübadiləsi aparılıb.

İqtisadiyyat və Sənaye naziri, Azərbaycan Respublikası ilə İran İslam Respublikası arasında iqtisadi, ticarət və humanitar sahələrdə əməkdaşlıq üzrə Dövlət Komissiyasının həmsədri Şahin Mustafayev ölkələrimiz arasında əlaqələrin yüksək səviyyədə olduğunu, dövlət başçılarının qarşılıqlı səfərlərinin və keçirilən görüşlərin əməkdaşlığın genişləndirilməsində xüsusi önəmini qeyd edib. Bakıda keçirilən Beynəlxalq sənaye konfransında iştirakına görə iranlı nazirə təşəkkür edən Şahin Mustafayev, tədbirin sənaye sahəsində əlaqələrin inkişafı və təcrübə mübadiləsi baxımından əhəmiyyətini vurğulayıb.

İran İslam Respublikasının Sənaye, Mədən və Ticarət naziri Məhəmməd Rza Nemətzadə qonaqpərvərliyə görə minnətdarlığını bildirib, beynəlxalq sənaye konfransını yüksək qiymətləndirib. Nemətzadə İranda sənaye parklarının fəaliyyət göstərdiyini, bu sahədə qarşılıqlı təcrübə mübadiləsinin faydalı olacağını diqqətə çatdırıb.

Görüşdə İran iş adamları təmsil etdikləri şirkətlərin fəaliyyəti barədə məlumat verib, kənd təsərrüfatı, əczaçılıq, metallurgiya və digər sahələrdə əməkdaşlıq məsələləri müzakirə edilib.