Dünya üzrə açıq dənizdə ilk dəfə neftçıxarmanın əsası qoyulduğu “Neft Daşları” yatağında çıxarılması mümkün olan ehtiyatlar hələ çoxdur.  Məhz buna görə də son illər Azərbaycan Respublikası Dövlət Neft Şirkəti  istismara verilməsinin 65 ili tamam  olmuş bu yataqdakı  ehtiyatların işlənməyə cəlb edilməsi istiqamətində zəruri tədbirlər həyata keçirir. Bu məqsədlə yatağın ərazisində yeni stasionar özüllər inşa olunur, əlavə neft quyuları qazılır.

Dövlət Neft Şirkətindən verilən məlumata görə, “Neft Daşları” yatağı üçün yeni 602A saylı özülün tikinti işləri davam etdirilir. Xatırladaq ki, yeni özül ‘’Azneft’’ İstehsalat Birliyinin sifarişi ilə ‘’Neftqazelmitədqiqatlayihə’’ İnstitutunun layihəsi əsasında inşa olunur. 14 istismar quyusunun qazılması üçün inşa edilən özül dənizin 18 metr dərinliyində yerləşdiriləcək. Özül yaşayış bloku, vertolyot meydançası, 2 ədəd qaldırıcı kran və digər zəruri avadanlıqlarla təchiz olunacaq, burada 8 ədəd dayaq bloku, 8 eyni sayda aralıq seksiyası, 11 ədəd minik-yanalma meydançası, 2 ədəd piyada körpüsü, 14 ədəd quyu istiqamətləndiricisi və 1 ədəd qülləaltı postamentin quraşdırılması nəzərdə tutulur. İndiyədək dayaq blokları və aralıq seksiyaların, 4 ədəd minik meydançası və eyni sayda yanalma meydançasının, 30 ədəd konsolun quraşdırılması başa çatdırılmış, eləcə də 48 ədəd svay vurulmuş, 39 ədəd svay sement məhlulu ilə doldurulmuşdur. “Neftqaztikinti” Trestinin 3 saylı tikinti-quraşdırma idarəsi tərəfindən həyata keçirilən işlərin cari ilin sonuna kimi başa çatdırılması nəzərdə tutulur.

Bu günlərdə isə ölkəmizin neft-qaz sənayesində əhəmiyyətli rola malik “Neft Daşları” yatağındakı 915 saylı stasionar dəniz özülündən ləğv olunmuş 1651 nömrəli quyu əsaslı təmir və geoloji tədbirdən sonra istismara verilmişdir. Quyu Fasilə lay dəstəsindən 2356-2342 metr intervaldan sutkalıq 10 ton neft hasilatı ilə istismara daxil edilmişdir. Xatırladaq ki, quyuda istismar işləri “Neft Daşları” Neft və Qazçıxarma İdarəsi tərəfindən həyata keçirilir.

M. YAQUBZADƏ,

“Xalq qəzeti”