Rabitə və Yüksək Texnologiyalar Nazirliyinin (RYTN) Dövlət Radiotezliklər İdarəsinin (DRİ) mütəxəssisləri  cari ilin 10 ayı ərzində iş planına və DRİ-yə daxil olmuş müraciətlərə əsasən, təşkilat və müəssisələrdə istismar olunan radioelektron vasitələrə (REV) müvafiq qaydada texniki baxış keçirərək 711 akt tərtib etmişlər.

Dövlət Radiotezliklər İdarəsindən aldığımız məlumatda bildirilir ki, müəssisə və təşkilatlarda keçirilən texniki baxış zamanı 292 ədəd DRİ-də qeydiyyatdan keçməyən müxtəlif növ radioelektron vasitələr aşkar olunmuşdur.

Onlardan 131 ədədi möhürlənmiş, 107 ədədi qeydiyyata alınmış və 54 ədədinin qeydiyyata salınması üçün müvafiq tədbirlər görülməkdədir.

Qeydiyyatdan keçməyən qeyri-qanuni radioelektron vasitələrin istifadəçilərinə qarşı İnzibati Xətalar Məcəlləsinin pozulması barədə 28  protokol tərtib olunmuş və müvafiq hüquqi tədbirlərin görülməsi üçün aidiyyəti rayon məhkəmələrinə müraciət edilmişdir.

Samirə ƏLİYEVA,

“Xalq qəzeti”