Rusiyada ABŞ dollarının dəyəri rekord həddə çatıb. APA-nın Moskva müxbirinin verdiyi xəbərə görə, dünən paytaxt birjasında 1 dollar 1,86 rubl bahalaşaraq 44,41 rubla, avro isə 1,94 rubl bahalaşaraq 55,61 rubla bərabər olub.

Rusiya Mərkəzi Bankı bu günədək rublun dollara nisbətdə möhkəmlənməsi üçün hər gün 350 milyon dollar xərclədiyini açıqlayıb. 2014-cü ilin əvvəlindən bu məqsədlə 70 milyard dollar xərclənib. Mərkəzi Bankın son bir ayda dolların bahalaşmasının qarşısını almaq üçün xərclədiyi vəsait isə 25 milyard dolları keçib.

Qeyd edək ki, Rusiya Prezidenti Vladimir Putin dolların bahalaşmasını dayandırmaq üçün ölkənin valyuta ehtiyatlarını tükətmək niyyətində olmadıqlarını bəyan edib. Bu üzdən də Rusiya Mərkəzi Bankı gələn ildən etibarən rublun məzənnəsinin sərbəst buraxılması üçün fəaliyyətini davam etdirir. Yəni 2015-ci ildən rubl dollara nisbətdə dəyərini bazarda özü tənzimləyəcək.

Rublun sürətlə ucuzlaşmasının səbəbi Rusiya iqtisadiyyatının əsasını təşkil edən neft və təbii qazın qiymətlərinin dünya bazarında aşağı düşməsidir. Hazırda birjalarda “Brent” markalı neftin 1 bareli 83 dollara satılır. Neftin barelinin 1 dollar ucuzlaşması Rusiya iqtisadiyyatına gün ərzində 1 milyard dollardan çox zərər vurur.