Azərbaycan və Polşa arasında kənd təsərrüfatının emal, damazlıq sahələrində, eləcə də ticarət əlaqələrinin inkişaf etdirilməsi üçün geniş imkanlar var.

İqtisadiyyat və sənaye naziri Şahin Mustafayevin Azərbaycanda səfərdə olan Polşa Respublikasının kənd təsərrüfatı və kəndin inkişafı naziri Marek Savitskinin başçılıq etdiyi nümayəndə heyəti ilə görüşü zamanı ölkələr arasındakı mövcud iqtisadi əlaqələrə, həmçinin kənd təsərrüfatı sahəsində əməkdaşlıq perspektivlərinə dair fikir mübadiləsi aparılıb.

Nazirlikdən AzərTAc-a bildiriblər ki, Şahin Mustafayev qarşılıqlı səfərlərin və yüksək səviyyəli görüşlərin əməkdaşlığın genişləndirilməsində xüsusi rolunu qeyd edib, Polşa nümayəndə heyətinin ölkəmizə səfərinin əlaqələrin inkişafı baxımından əhəmiyyətini diqqətə çatdırıb. Vurğulanıb ki, iki ölkə arasında müqavilə-hüquqi baza yaradılıb, iqtisadi əməkdaşlıq üzrə Hökumətlərarası Komissiya fəaliyyət göstərir, ticarət dövriyyəsinin dinamik artımı müşahidə olunur.

Azərbaycan iqtisadiyyatı barədə məlumat verən nazir kənd təsərrüfatının qeyri-neft sektorunun aparıcı sahələrindən olduğunu, bu istiqamətdə sistemli dövlət dəstəyi tədbirlərinin həyata keçirildiyini, müasir texnologiyalara əsaslanan kənd təsərrüfatı məhsullarının istehsalı və emalının genişləndiyini diqqətə çatdırıb. Ş.Mustafayev iş adamları arasında görüşlərin keçirilməsinin işgüzar əlaqələrin genişləndirilməsində faydalı olacağına əminliyini ifadə edib.

Marek Savitski Polşanın kənd təsərrüfatı və bu sahənin inkişaf perspektivləri barədə məlumat verib, ölkələrimiz arasında aqrar sahədə əməkdaşlıq imkanları barədə fikirlərini bölüşüb.