Azərbaycan Respublikasının Prezidenti İlham Əliyevin 2008-ci il 9 oktyabr tarixli sərəncamına əsasən, noyabrın 1-i ölkəmizdə Kənd Təsərrüfatı İşçiləri Günü kimi qeyd olunur.

Noyabrın 1-də bu münasibətlə keçirilən tədbirdə Kənd Təsərrüfatı naziri Heydər Əsədov aqrar sektorda çalışanları peşə bayramları münasibətilə təbrik edib, gələcək işlərində uğurlar arzulayıb.

Nazir Heydər Əsədov kənd təsərrüfatı sahəsində ulu öndər Heydər Əliyevin başladığı islahatların uğurla həyata keçirilməsindən, Prezident İlham Əliyevin kənd təsərrüfatı məhsulları istehsalçılarına qayğısından, əldə edilən uğurlardan və qarşıda duran vəzifələrdən danışıb. Məlumat verilib ki, yaxın vaxtlarda nazirliyin ərazi kənd təsərrüfatı idarələrinin tikintisi başa çatacaq. Daha sonra aqrokimya, baytarlıq laboratoriyaları, diaqnostik kabinetlər təmir ediləcək. Tikilməkdə olan ət kəsimi məntəqələri, yaşıl marketlər gələn ilin əvvəlində istifadəyə veriləcək. Həmçinin ilkin olaraq bir neçə rayonda mal bazarlarının inşasına başlanılıb.

Azərbaycanda aqrar islahatların həyata keçirilməsinə və kənd təsərrüfatının inkişafına xüsusi diqqət yetirildiyini qeyd edən nazir bildirib ki, beynəlxalq təşkilatlarla əməkdaşlığın genişləndirilməsi və qabaqcıl dünya təcrübəsinin öyrənilməsi istiqamətində davamlı iş aparılır.

Digər çıxış edənlər də aqrar sahədə aparılan islahatların müsbət nəticələrindən, görülən işlərdən, dövlət tərəfindən bu sahəyə göstərilən diqqət və qayğıdan danışıblar. Çıxışlarda yüksək məhsuldarlığa və səmərəliliyə, qabaqcıl texnologiyaların tətbiqinə, yerli məhsulların rəqabət qabiliyyətinin artırılmasına nail olunacağı vurğulanıb.

AzərTAc