Rabitə və Yüksək Texnologiyalar naziri Əli Abbasov Küveytin informasiya naziri və gənclər məsələləri üzrə dövlət naziri Şeyx Salman Sabah Salem əl-Hamud əl-Sabahın rəhbərlik etdiyi nümayəndə heyəti ilə görüşmüşdür.

 Nazirlikdən aldığımız məlumatda bildirilir ki, iki ölkə arasında səmimi dostluq təməli üzərində qurulan əlaqələrdən söz açan nazir Əli Abbasov informasiya-kommunikasiya texnologiyaları sahəsində əməkdaşlığın davam etdirilməsi üçün yüksək potensialın mövcud oduğunu diqqətə çatdırmışdır. Küveytin bu sahədə önəmli nailiyyətlər qazandığını bildirən nazir daha sonra qonaqları Rabitə və Yüksək Texnologiyalar Nazirliyinin əsas fəaliyyət istiqamətləri ilə tanış etmiş və gələcək əməkdaşlıq perspektivlərindən danışmışdır.

Küveyt dövlətinin ölkəmizlə intensiv əlaqələrin qurulmasına xüsusi maraq göstərdiyini bildirən nazir Şeyx Salman Sabah Salem əl-Hamud əl-Sabah da Azərbaycan-Küveyt münasibətlərinin xalqlarımızın mənafeyinə uyğun dostluq və əməkdaşlıq zəminində inkişaf etdirilməsinin zəruriliyini vurğulamışdır.

 Ölkəsinin İKT sahəsində strategiyası və bu sahədə aparılan dövlət siyasəti haqda ətraflı söhbət açan qonaq əlaqələrin inkişafı baxımından Azərbaycanla Küveyt arasında Texniki Qrupun yaradılmasını və İKT sektorunda gələcək əməkdaşlıq istiqamətlərinin müəyyənləşdirilməsini təklif etmişdir. Münasibətlərin yeni mərhələyə qədəm qoymasını və qarşılıqlı səfərlərin əhəmiyyətini  vurğulayan küveytli nazir “Bakutel” sərgisinə maraq göstərdiklərini qeyd edərək, sayca 20-ci telekommunikasiya sərgisində Küveytin İKT şirkətlərinin təmsil olunması istəyini bildirmişdir. Görüşdə digər maraq doğuran istiqamətlər üzrə ətraflı fikir mübadiləsi aparılmışdır.

Samirə ƏLİYEVA,

“Xalq qəzeti”