Azərbaycan və Türkiyə arasında illik ticarət dövriyyəsi 15-20 milyard dollar səviyyəsinə qədər qalxa bilər.

“APA - Economics” xəbər verir ki, bunu jurnalistlərə açıqlamasında Türkiyənin Azərbaycandakı səfiri Alper Coşkun Bakıda keçirilən Azərbaycan-Türkiyə biznes forumdan sonra bildirib.

Forum barədə danışan səfir qeyd edib ki, hər il təşkil edilən belə toplantılarda bir sıra mühüm qərarlar qəbul edilir: “Bu qərarlarda, iki ölkə arasında həm qarşılıqlı investisiyaların həyata keçirilməsi, həm də ticarət əlaqələrinin hazırkı 4-5 milyard dollarlıq səviyyədən daha yüksək səviyyəyə, yəni illik 15-20 milyard dollar səviyyəsinə çıxarılması kimi hədəflər müəyyənləşdirilib. Eyni zamanda, Azərbaycan və Türkiyə iş adamlarının həyata keçirəcəkləri qarşılıqlı investisiya layihələrindən həm də üçüncü ölkələrin bu layihələrə cəlb edilməsi məsələsi gündəmdədir”.

Diplomat bildirib ki, biznes forumda Türkiyədən gələn iş adamları müəyyən sektorlar üzrə azərbaycanlı tərəfdaşları ilə bir çox sahələrdə ikitərəfli danışıqlar aparacaqlar: “Onlar həm birlikdə, həm də üçüncü dövlətlərlə hansı sahələrdə əməkdaşlıq edə biləcəklərini müəyyənləşdirəcəklər. Bunlar çox mühüm təşəbbüslərdir. Çünki iş adamlarının ehtiyac duyduqları bəzi mühüm amillər var. Bunlar siyasi sabitlik, iqtisadi inkişaf üçün mühitin yaradılması və dövlət nümayəndələrinin bunlar üçün siyasi iradə göstərmək bacarıqlarıdır. Həm Türkiyədə, həm də Azərbaycanda iş adamlarını bu məsələdə dəstəkləmək üçün münbit şərait yaranıb”.

 Səfir bildirib ki, dünyada gedən iqtisadi tənəzzülə və yaxın bölgələrdə baş verən proseslərə baxmayaraq, Azərbaycan güclü inkişaf yolunda yeni hədəflər müəyyənləşdirərək uğurla addımlamaqdadır.