Bakıda “İnkişaf etməkdə olan ölkələrdə makroiqtisadi siyasət və maliyyə sabitliyi məsələləri” mövzusunda 1-ci Beynəlxalq Tədqiqat Konfransı keçirilir.

Azərbaycan Mərkəzi Bankından AzərTAc-a bildiriblər ki, iki gün davam edəcək konfransda ümumilikdə 15 ölkənin mərkəzi bankları və universitetlərindən 30-a yaxın tanınmış tədqiqatçı, habelə ölkəmizin qabaqcıl ali məktəblərinin, beyin mərkəzlərinin mütəxəssisləri və maliyyə-bank sektorunun nümayəndələri iştirak edirlər.

Konfransı açan Azərbaycan Mərkəzi Bankının sədr müavini Xəqani Abdullayev dünyada makroiqtisadi siyasət sahəsində son meyillər barədə məlumat verib. Sonra ABŞ-ın Kaliforniya Universitetinin professoru Joshua Aizenmanın və Türkiyənin Bilkent Universitetinin professoru Refet Gürkaynakın məruzələri dinlənilib.

Sessiyalarda postböhran dövründə qlobal tarazlığın bərpası və makroiqtisadi çağırışlar, inkişaf etməkdə olan ölkələrdə monetar siyasət çərçivəsi, mərkəzi banklarda modelləşdirmə və proqnozlaşdırma təcrübəsi, makro-prudensial siyasət və maliyyə bazarlarının tənzimlənməsi kimi məsələlər ətrafında təqdimatlar edilib, müzakirələr aparılıb.