Gürcüstanın paytaxtı Tbilisidə DEA (Data Exchange Agency) və FİRST təşkilatının birgə əməkdaşlığı nəticəsində beynəlxalq simpozium keçirilmişdir.

Bu beynəlxalq tədbirdə ölkəmizi Azərbaycan Respublikası Rabitə və Yüksək Texnologiyalar Nazirliyi yanında Elektron Təhlükəsizlik Mərkəzinin əməkdaşları – Aysel Hadıyeva və Fərhad Rəhimli təmsil etmişlər.

Proqram müddətində digər ölkələrin CERT komandalarından olan nümayəndələri, həmçinin, FİRST beynəlxalq təşkilatının əməkdaşları ilə təcrübə və fikir mübadilələri aparılmışdır.

Rabitə və Yüksək Texnologiyalar Nazirliyindən aldığımız məlumatda deyilir ki, elektron təhlükəsizlik mövzusunda ikigünlük təlim proqramını da əhatə edən simpoziumda əsasən aşağıdakı mövzularda müzakirələr aparılmışdır:

- DDOS hücumların qarşısının alınması üçün lazımi hazırlıq tədbirlərinin və texniki vasitələrin təşkili və dəstəklənməsi;

- CERT komandalarının işinin səmərəliyinin artırılması üçün yeni mütəxəssislərin seçmə və hazırlanma prosesi üzrə beynəlxalq təcrübədən istifadə;

- İnformasiya təhlükəsizliyi sahəsi üzrə beynəlxalq məlumat axınlarının qəbulu və emal edilməsi;

- İnformasiya təhlükəsizliyi sahəsində beynəlxalq və yerli qanunvericilik bazaları.

Tədbirdə iştirak edən Elektron Təhlükəsizlik Mərkəzinin əməkdaşları müzakirələrdə fəal iştirak etmişlər.

Samirə ƏLİYEVA,

“Xalq qəzeti”