Qlobal iqtisadi böhran şəraitində Azərbaycan iqtisadiyyatı mənfi xarici iqtisadi təsirlərə dayanıqlılıq nümayiş etdirib. Hazırda ölkənin xarici borcunun ÜDM-ə nisbəti səkkiz faizdir.

Raja Almarzoqinin rəhbərlik etdiyi Beynəlxalq Valyuta Fondunun (BVF) Azərbaycan üzrə missiyası ilə görüşdə bu barədə danışan iqtisadiyyat və sənaye naziri Şahin Mustafayev Azərbaycan iqtisadiyyatı və həyata keçirilən layihələr, “Azərbaycan 2020: gələcəyə baxış” İnkişaf Konsepsiyasının hədəfləri barədə məlumat verib.

Nazirlikdən AzərTAc-a bildiriblər ki,  nazir Azərbaycanda möhkəm siyasi və makroiqtisadi sabitliyin, davamlı və dayanıqlı iqtisadi inkişafın təmin olunduğunu missiyanın diqqətinə çatdırıb. Bildirilib ki, ölkəmizdə əlverişli biznes və investisiya mühiti yaradılıb, iqtisadi inkişafda özəl bölmənin rolu artıb. Azərbaycan iri infrastruktur layihələrinin, bu yaxınlarda təməlqoyma mərasimi keçirilən Cənub Qaz Dəhlizinin təşəbbüskarı və fəal iştirakçısıdır.

2014-cü ilin Azərbaycanda “Sənaye ili” elan edildiyini, bu sahədə müvafiq Tədbirlər Planının həyata keçirildiyini qeyd edən Şahin Mustafayev hazırda sənaye parklarının və məhəllələrinin yaradılması istiqamətində işlərin görüldüyünü, dəmir filizinin hasilatından polad istehsalına qədər bütün mərhələləri əhatə edəcək kompleksin və müasir texnologiyalara əsaslanan sənaye müəssisələrinin yaradıldığını vurğulayıb.

Görüşdə missiya üzvləri tərəfindən diversifikasiya, dövlət xərcləri, inflyasiyanın hədəflənməsinə dair BVF-nin gələcəkdə aparacağı təhlillər barədə təqdimatlar keçirilib, missiya üzvlərinin sualları cavablandırılıb, iqtisadi inkişafın perspektivləri barədə fikir mübadiləsi aparılıb.