Prezident İlham Əliyev Vyetnam Sosialist Respublikasına səfəri zamanı yaxın gələcəkdə iki ölkə arasında ticarət dövriyyəsinin 1 milyard ABŞ dollarına çatdırılmasının mümkünlüyünü vurğulayıb. Ölkə başçısının qarşıya qoyduğu tapşırıqların reallaşdırılması üçün bir sıra tədbirlərin, o cümlədən noyabrın 25-26-da enerji sahəsinə həsr olunan elmi-praktik konfransın keçirilməsi planlaşdırılır.

Dövlət Neft Şirkətinin mətbuat xidmətindən AzərTAc-a bildiriblər ki, bu barədə oktyabrın 16-da ölkəmizin Vyetnam Sosialist Respublikasındakı səfiri Anar İmanov şirkətin baş ofisində Azərbaycan-Vyetnam əməkdaşlığı istiqamətində yaranmış yeni inkişaf meyillərinin müzakirəsinə həsr olunmuş görüşdə məlumat verib.

Səfir bildirib ki, Prezident İlham Əliyevin Vyetnam Sosialist Respublikasına səfəri bu ölkədə Azərbaycana marağı əhəmiyyətli dərəcədə artırıb. Səfər çərçivəsində keçirilmiş biznes forum isə Vyetnam iş adamlarında  Azərbaycan haqqında müsbət fikirlərin formalaşmasına səbəb olub.

Ötən müddətdə görülmüş işlərlə bağlı neft sənayesi işçilərinə ətraflı məlumat verən A.İmanov Prezident İlham Əliyevin qarşıya qoyduğu məqsədlərin reallaşdırılması istiqamətində təmsil etdiyi strukturun bir sıra tədbirlər keçirməsini planlaşdırdığını diqqətə çatdırıb.

Dövlət Neft Şirkətinin birinci vitse-prezidenti, akademik Xoşbəxt Yusifzadə Azərbaycan ilə Vyetnam Sosialist Respublikası arasındakı ənənəvi əməkdaşlıq əlaqələrindən söhbət açaraq bildirib ki, vaxtilə Azərbaycanda təhsil almış vyetnamlı mütəxəssislər hazırda bu ölkənin ən böyük neft şirkətləri olan “Petrovyetnam” və “Vietsovpetro”da rəhbər vəzifələrdə çalışırlar. Azərbaycanın neft sənayesində istifadə olunan avadanlıqlar Vyetnam mütəxəssislərinə yaxşı tanışdır.