İqtisadi Əməkdaşlıq və İnkişaf təşkilatının Maliyyə Tədbirləri üzrə işçi qrupunun (FATF) nümayəndə heyəti Mərkəzi Bankın sədri Elman Rüstəmovla görüşmüşdür.
Görüşdə pulların yuyulması və terrorizmin maliyyələşdirilməsinə qarşı mübarizə sistemi üzrə Azərbaycanın əldə etdiyi nailiyyətlərin qiymətləndirilməsi və ölkəmizin FATF-ın siyahısından çıxarılması üzrə təkliflərin hazırlanması məsələləri müzakirə olunmuşdur.
Nümayəndə heyətinin üzvləri Azərbaycanın bu sahədə gördüyü tədbirləri yüksək qiymətləndirmişlər. Qonaqlar təmsil etdikləri qurumun ölkəmizlə, xüsusilə Mərkəzi Bankla əməkdaşlıqdan məmnun qaldıqlarını bildirərək, bu əlaqələrin gələcəkdə də davam etdiriləcəyinə ümidvar olduqlarını qeyd etmişlər.
E.Rüstəmov ikitərəfli əlaqələrin uğurla inkişaf etdiyini bildirmiş, FATF-ın Azərbaycanla əməkdaşlığını təqdirəlayiq hesab etdiyini vurğulamışdır.
Görüşdə FATF-ın icraçı katibi Kevin Vandertqrift, ABŞ-ın Maliyyə Departamentinin Terrorçuluğun maliyyələşdirilməsi və maliyyə cinayətləri Agentliyinin siyasi məsləhətçisi Kristofer Burdik, Avropa Şurasının Moneyval Komitəsinin icraçı katibi Con Rinqas, Almaniya Federal Maliyyə Nəzarəti Təşkilatının pulların yuyulmasına qarşı mübarizə bölməsinin rəhbəri Cens Ferhof iştirak etmişlər.