Dünya Bankı bəyan etmişdir ki, Azərbaycanın təşəbbüsü ilə irəli sürülən TASİM layihəsinin reallaşdırılması gələcəkdə ölkənin regional əməkdaşlıqda rolunun artırılmasına səbəb olacaq.

Dünya Bankının Azərbaycan üzrə meneceri Larisa Leşçenkonun verdiyi məlumata əsasən, hazırda bu layihənin icrası ilə bağlı bir neçə variant Dünya Bankı ilə Azərbaycan hökuməti arasında müzakirə mövzusudur: “Biz bu layihənin gələcək səmərəsi barədə proqnozlar verməyə hələlik hazır deyilik. Lakin birmənalı olaraq deyə bilərəm ki, TASİM-in reallaşdırılması gələcəkdə Azərbaycanın regional əməkdaşlıqda rolunu artıracaq, ölkəni beynəlxalq rabitə və məlumat ötürmə bazarında qlobal səviyyəyə çıxardacaq. Azərbaycan “İpək yolu”nun bir hissəsinə çevriləcək. “İpək yolu” informasiya axını yoluna çevriləcək. Azərbaycanın bu layihənin reallaşdırılmasında aktiv mövqe tutması çox təqdirəlayiqdir”.

Samirə ƏLİYEVA,

“Xalq qəzeti”