Azərbaycan Dünya İqtisadi Forumunun (WEF) “Qlobal rəqabətqabiliyyətlilik hesabatı 2014-2015" (Global Competitiveness Report 2014-2015) adlı hesabatında 144 ölkə arasında 38-ci yeri tutur.

“APA - Economics”in məlumatına əsasən, Azərbaycan sözügedən hesabatda ötənilki göstərici ilə müqayisədə bir pillə irəliləyib.

Hesabata görə, biznesin qeydiyyatı üçün lazım olan prosedurların sayına görə Azərbaycan 10-cu yeri, biznesin qeydiyyatı üçün tələb olunan vaxta görə isə 36-cı yeri tutub.

ÜDM-in həcminə görə, ölkəmiz 70-ci pillədə qərarlaşıb. İnflyasiyanın ən aşağı səviyyəsinə görə Azərbaycan birinci yeri tutub.

Hesabatda bildirilir ki, makroiqtisadi stabilliyə görə Azərbaycan 9-cu, biznesə dəstək üzrə 80-ci, əmək bazarının effektivliyi üzrə 33-cü, infrastrukturun inkişafına üzrə 70-ci, ali təhsil üzrə 90-cı,  maliyyə bazarlarının inkişafı üzrə 89-cu yerləri tutur.

Avtomobil yollarının keyfiyyətinə görə Azərbaycan 69-cu, dəmir yolu infrastrukturunun keyfiyyətinə görə 37-ci, hava yolları infrastrukturunun keyfiyyəti üzrə 44-cü yerdə qərarlaşıb.

Bundan başqa, dövlət siyasətinin şəffaflığına görə Azərbaycan 48-ci yeri tutub.

Vergitutma effektivliyi sahəsində Azərbaycan 82-ci yerdədir.

Hesabatda birinci yeri İsveçrə tutur, ikinci və üçüncü yerlərdə müvafiq olaraq Sinqapur və ABŞ qərarlaşıb.