N.Nərimanov adına NQÇİ tərəfindən istismar olunan “Bulla-dəniz” yatağında qaz-kondensat quyusunun qazılması üçün inşa olunacaq 122 saylı stasionar dəniz özülünun (SDÖ) tikinti layihəsi hazırlanıb.

Trend ARDNŞ-in rəsmi saytına istinadən məlumat verir ki, özüldə aparılacaq işlərin ekoloji standartlara uyğunlaşdırılması məqsədilə “Azneft” İB Azərbaycan Respublikasının qanunvericilik aktlarına uyğun olaraq Ekologiya İdarəsinə Ətraf Mühitə və Sosial Sahələrə Təsirin Qiymətləndirilməsi (ƏMSSTQ) sənədinin hazırlanması haqqında sifariş verib. Sifarişə operativ əməl olunub.

Sənədin məqsədi layihənin icrası zamanı ətraf mühitə və sosial sahəyə hər hansı mənfi təsirin aşkar edilməsini və bu təsirin minimuma endirilməsini, aradan qaldırılmasını, yaxud əvvəlcədən aşkar edildiyi müddətdə əks tədbirlərin görülməsini təmin etməkdir. Bu məqsədlə Ekologiya İdarəsinin Ekoloji Monitorinq Departamentinin əməkdaşları tərəfindən “Bulla-dəniz” yatağında və özül tikiləcək akvatoriyada ətraf mühitin ilkin vəziyyətini qiymətləndirmək üçün ekoloji tədqiqat işləri aparılıb.

Monitorinq zamanı seçilmiş stansiyalardan dəniz suyunda fitoplankton və zooplankton nümunələri, dəniz dibindən dib çöküntüləri və bentos nümunələri görürülüb, dəniz suyunun fiziki-kimyəvi parametrləri “Professional Plus” cihazı vasitəsilə yerində ölçülüb və bütün nəticələr yekun hesabatda öz əksini tapıb.

ƏMSSTQ sənədində layihənin icrasında ətraf mühit üzrə yüksək standartlara cavab verən tələblərin nəzərə alınması və yerinə yetirilməsinin təmin olunması xüsusi vurğulanıb.