Dövlət Neft Şirkəti üzrə hasil edilən ümumi neftin təqribən 65 faizini verən “Günəşli” yatağında infrastrukturun təkmilləşdirilməsi istiqamətində işlər davam etdirilir. Yataqdakı neft və qaz ehtiyatlarının hasilatına imkan yaratmaq məqsədilə burada yeni özüllər inşa edilir, uzun illər istismarda olan özüllər əsaslı şəkildə təmir olunur.

Hazırda buradakı 11 saylı dərin dəniz özülündə əsaslı təmir işləri aparılır. Xatırladaq 1986-cı ildən istismarda olan özülün uzunömürlüyünü təmin etmək məqsədilə görülən təmir işləri istismar prosesini məhdudlaşdırmadan və özüldəki mövcud texnoloji avadanlıqlardan istifadə etməklə həyata keçirilir. Artıq İndiyədək sudan 4-9 metr hündürlükdə 67 ədəd müxtəlif diametrli suüstü rabitə konstruksiyaları yeniləri ilə əvəz olunmuş, 1149 kvadratmetrlik döşəmə, eləcə də 140 ədəd döşəməaltı tir təmir edilmişdir. Bundan əlavə, daha 1411 ədəd suüstü rabitə konstruksiyasının, 5513 kvadratmetrlik döşəmənin və 250 ədəd döşəməaltı tirin təmir olunması nəzərdə tutulur.

“Azneft” İstehsalat Birliyi 28 May adına Neft və Qazçıxarma İdarəsinin sifarişi ilə “Neftqaztikinti” Trestinin 2 saylı Tikinti-Quraşdırma İdarəsi tərəfindən həyata keçirilən işlərin bu ilin dekabr ayında tam başa çatdırılması planlaşdırılır.

M. YAQUBZADƏ,

“Xalq qəzeti”