İnformasiya texnologiyaları sektorunun inkişaf tempi İKT sektorunun ümumi artım tempindən daha yüksəkdir və ilbəil xüsusi çəkisi çoxalmaqdadır. Bu məlumat “Rabitə və İnformasiya Texnologiyaları Nazirliyi - 2013" adlı illik hesabatda yer alıb. Rabitə və Yüksək Texnologiyalar Nazirliyi (RYTN)

tərəfindən nəşr olunan hesabatda qeyd olunur ki, 2013-cü ildə 2012-ci illə müqayisədə informasiya texnologiyalarının xüsusi çəkisi 8,6 faizdən 10 ,faizə yüksəlib.

Nazirlikdən aldığımız məlumatda bildirilir ki, 2013-cü ildə ölkənin informasiya texnologiyaları sektorunun gəlirləri 219,1 milyon ABŞ dollarına çatıb və əvvəlki illə müqayisədə 1,3 dəfə genişlənib.

İnformasiya texnologiyaları sahəsində xüsusilə kompyuter periferiya avadanlıqlarının və proqram təminatının topdansatışında 107,2 faiz, proqram təminatının işlənməsində 63,5 faiz, elektron və radioelementlərin istehsalında 56,4 faiz artım müşahidə olunub. İstehsal sahəsi ilbəil daha da artmaqdadır. Hazırda ölkənin İT sektorunda istehsal sahəsinin xüsusi çəkisi 31,5 faiz, xidmət-ticarət sahəsinin isə 68,5 faiz təşkil edir. 2009-cu ildə isə bu nisbət müvafiq olaraq 24,4 faiz və 75,6 faiz təşkil edib.

Ümumiyyətlə, bu gün Azərbaycanda İnformasiya Texnologiyaları sənayesi inkişaf edir, yerli şirkətlərin peşəkarlıq səviyyəsi yüksəlir, ölkənin şirkətləri yerli layihələrlə yanaşı, Cənubi Qafqazda və Mərkəzi Asiya ölkələrində layihələr icra edir. Azərbaycanda istehsal olunan kompyuterlər, elektron avadanlıqları və proqram təminatı region bazarlarına ixrac olunur.

Samirə ƏLİYEVA,

“Xalq qəzeti”