Avqustun 31-də müxtəlif vaxtlarda ölkəmizə qaçaq yolu ilə gətirilən 76 min 628 qutu çeşidli siqaret orqaneptik fiziki və kimyəvi göstəriciləri 3935-2000 saylı DÜST-ün tələblərinə cavab vermədiyinə və tütün məmulatlarının tərkibində fosfamidlərin miqdarı normadan 2 dəfə yüksək olduğuna görə "Azərterminalkompleks" Təsərrüfathesablı Xarici İqtisadi Birliyin nəzdində fəaliyyət göstərən məhvetmə komissiyası və Dövlət Gömrük Komitəsi nümayəndələrinin iştirakı ilə məhv edilmişdir.
Bundan əlavə, gömrük əməkdaşlarının müsadirə etdiyi 38 "Qold" qəhvəsi, 830 ədəd üzərində "Moskva Kristal" və "Sankt-Peterburq" sözləri yazılmış araq qapağı, 23 min 859 müxtəlif növ dərman preparatı, 453 protexniki vasitə, 21 min 865 dəst disk, Ermənistan istehsalı olan 4 konyak, 91 min təyinatı məlum olmayan yarımkeçiricinin də istifadəyə yararsızlığı təsdiq olunaraq yandırılmışdır.
Dövlət Gömrük Komitəsinin Gömrük Sahəsində Hüquqpozmalara qarşı Mübarizə Baş İdarəsinin təhqiqat şöbəsinin rəisi Fikirət Ələsgərli bildirmişdir ki, məhv edilən mallar komitənin əməkdaşları tərəfindən müxtəlif vaxtlarda aşkar olunmuşdur. Sonradan müvafiq məhkəmə qərarları ilə müsadirə olunmuş mallar ekspert rəyinə əsasən istifadə üçün yarasız hesab edilmişdir. Qanunsuz malların məhvi "Azərterminalkompleks" TH XİB-də fəaliyyət göstərən məhvetmə komissiyası tərəfindən həyata keçirilir.
AzərTAc{nl}