Binəqədi Rayon İcra Hakimiyyətinin dəstəyi ilə “Binəqədi Sahibkarları” İctimai Birliyi tərəfindən rayon ərazisində fəaliyyət göstərən müəssisələrdə istehsal olunan müxtəlif təyinatlı məhsulların sərgisi keçirilmişdir.

Tədbirin əvvəlində Prezident İlham Əliyevin “Sənaye ili” barədə fikirləri səsləndirilmişdir.

Yarmarkada Binəqədi Rayon İcra Hakimiyyəti başçısının birinci müavini İlqar Süleymanov, RİH başçısının müavinləri Vüsal İsmayılov və Aygün Əliyeva, Azərbaycan Respublikası Sahibkarlar Təşkilatları Milli Konfederasiyasının Prezidenti Məmməd Musayev, Sahibkarlığa Kömək Milli Fondunun icraçı direktoru Şirzad Abdullayev və “Binəqədi Sahibkarları” İctimai Birliyinin sədri Yusif Ağayev iştirak etmişlər.

Tədbiri giriş sözü ilə açan Binəqədi RİH başçısının birinci müavini İlqar Süleymanov icra hakimiyyəti ilə yerli sahibkarlar arasındakı əlaqələrin günbəgün mökəmləndiyinə toxunmuş, bu əlaqələrin rayonun sosial-iqtisadi inkişafı üçün əlverişli zəmin yaratdığını vurğulamışdır.

Sənaye və qida məhsullarının yarmarkasında 70-ə yaxın sahibkar iştirak etmiş və 22-si sənaye, 9-u qida müəssisəsi olmaqla, “Bakı Poladtökmə” ASC, “Xırman” MMC, “Saba” MMC, “Coca-Cola” və s. kimi məşhur müəssisələr öz məhsullarını nümayiş etdirmişlər. Binəqədi rayonundakı Heydər Əliyev adına istirahət parkında keçirilən yarmarkaya rayon ictimaiyyətindən 1000-ə yaxın şəxs qatılmışdır.

İştirak edənlərin böyük marağına səbəb olan yarmarkada sərgilənən sənaye və qida məhsulları tədbir iştirakçılarına ödənişsiz olaraq paylanmışdır.

“Xalq qəzeti”