Dövlət Neft Şirkətinin Kompleks Qazma İşləri Trestinin kollektivi neft və qaz hasilatını artırmaq üçün qazma işlərini intensiv şəkildə davam etdirir. Qazmaçılar bu günlərdə “Neft Daşları” yatağında yeni quyunu istismara vermişlər.

Adıçəkilən yataqdakı 2585 nömrəli stasionar dəniz özülündən qazılaraq neftçilərə təhvil verilmiş quyudan sutka ərzində 30 ton neft hasil ediləcək. Qirməki üstü Qumlu Lay Dəstəsinə qazılan 2600 nömrəli quyu fontan üsulu ilə istismar olunacaq. Xatırladaq ki,  quyu “Neft Daşları” Neft-Qazçıxarma İdarəsinin sifarişi ilə qazılmışdır.

Azərbaycanın dəniz yataqları arasında özünün zənginliyi ilə seçilən “Günəşli” yatağında da qazma işləri sürətlə davam etdirilir. Bu yaxınlarda qazmaçılar həmin yataqda daha bir qaz quyusunu istismara vermişlər. Aparılan geoloji tədbirlərdən sonra istismara daxil edilmiş yeni quyu “Günəşli” yatağındakı 6 saylı dərin dəniz özülündən qazılmışdır. Qirməki üstü Qumlu Lay Dəstəsindən qazılmış 70 nömrəli quyudan sutka ərzində 150 min kubmetr qaz hasilatı nəzərdə tutulur. Quyuda istismar işlərini “28 May” Neft-Qazçıxarma İdarəsi həyata keçirir.

Bundan əlavə, Kompleks Qazma İşləri Tresti tərəfindən “Darvin bankası” yatağında da yeni quyular qazılır. Hazırda trestin qazmaçıları “Abşeronneft” Neft-Qazçıxarma İdarəsinin sifarişi ilə adıçəkilən yataqda iki yeni quyuda qazma işlərini davam etdirirlər. Xatırladaq ki, “Darvin bankası” yatağındakı 740 nömrəli meydançadan qazılan 738 nömrəli quyunun layihə dərinliyi 940 metr, 720 nömrəli meydançadan qazılan 839 nömrəli quyunun layihə dərinliyi isə 1425 metrdir.

Geoloqların hesablamalarına görə, Qirməki Altı Lay Dəstəsinə qazılan həmin quyuların hər birindən sutka ərzində 5 ton neft hasil ediləcək.

M.YAQUBZADƏ,

“Xalq qəzeti”