SOCAR-AQŞ layihə dərinliyi 2950 metr olan “Fasilə” Lay Dəstəsinə (FLD) qazılan 352 saylı quyunu rekord müddətə-26 günə qazaraq layihə dərinliyinə çatdırmışdır.Müəssisəmiz 13 saylı stasionar dəniz özülündən 352 saylı quyuda qazma işlərini heç bir hadisəyə yol vermədən, ətraf mühiti çirkləndirmədən, vaxtından əvvəl və yüksək keyfiyyətlə başa vurmuşdur.  Bu quyu ‘’Günəşli’’ yatağının dayazsulu hissəsində FLD üzrə ən sürətlə qazılmış quyudur.

 Qeyd edək ki, 352 saylı quyuda qazma işlərinə 12 may 2014-cü ildə başlanılmış və cari ilin 6 iyun tarixində quyu 2961 metr qazılaraq layihə dərinliyinə çatdırılmışdır. Quyuya istismar kəməri endirilərək sementlənmişdir. Bundan əvvəlki rekord göstərici də məhz SOCAR- AQS-yə məxsusdur, Belə ki, 13 saylı stasionar dəniz özülündən qazılmış 351 saylı quyu -29 günə 3100 metr dərinliyə qazılaraq layihə dərinliyinə çatdırılmışdı.

 Sifarişçi tərəfindən FLD-ə qazılan quyuların qazma ilə başa çatdırılması üçün  ən azı 90 gün vaxt müəyyən edilsə də, əməliyyatlarında yeni idarəetmə üsulları, yeni texnologiya, standartlar və yeni yanaşma tətbiq edən SOCAR-AQŞ sifarişçi tərəfindən təyin edilən müddəti xeyli qabaqlamışdır.  Müəssisəmiz fəaliyyətinin bütün mərhələlərində  Sağlamlıq, Texniki Təhlükəsizlik və Ətraf Mühitin Mühafizəsinin (STTƏMM) təmin edilməsinə və quyuların keyfiyyətlə qazılaraq sifarişçiyə təhvil verilməsinə böyük önəm vermişdir. Sifarişçi ARDNŞ-nin “Azneft” İstehsalat Birliyidir.

Sənubər NƏZƏROVA,

SOCAR-AQŞ-nin ictimaiyyətlə əlaqələr üzrə mütəxəssisi