“Azərsu” Açıq Səhmdar Cəmiyyətinin  “Regional təlim-inkişaf proqramı-1" layihəsi çərçivəsində kompleks təlim planının icrasına başlanılmışdır.

 Şamaxı şəhərində keçirilən kompleks təlim proqramının açılış mərasiminin  iştirakçıları əvvəlcə Azərbaycan xalqının ümummilli lideri Heydər Əliyevin abidəsini ziyarət etmiş, Heydər Əliyev Mərkəzi ilə tanış olmuşlar. Daha sonra Şamaxı şəhərində soyqırımı qurbanlarının xatirəsinə ucaldılmış abidə ziyarət edilmişdir.

Təlimlərin açılış mərasimində çıxış edən Şamaxı Rayon İcra Hakimiyyətinin başçısı Asif Ağayev bölgələrdə həyata keçirilən içməli su və kanalizasiya  infrastrukturlarının yenidən qurulması layihələrinin əhalinin sosial rifahının yaxşılaşdırılmasına xidmət etdiyini bildirmişdir. Qeyd olunmuşdur ki, son zamanlar regionlarda, o cümlədən Şamaxıda həyata keçirilən içməli su və kanalizasiya layihələrinin icrasında müasir texnologiyalardan və avadanlıqlardan istifadə edilməsi ilə əlaqədar kadrların bilik və bacarıqlarının yüksəldilməsinə ciddi zərurət yaranmışdır. O, Şamaxıda keçirilən təlimlərin yüksək səviyyədə keçirilməsi üçün iştirakçılara lazımi şərait yaradılacağını bildirmişdir.

“Azərsu” ASC “Birləşmiş Sukanal” MMC-nin direktoru Etibar Məmmədov bildirmişdir ki, Prezident İlham Əliyevin ölkəmizin hər bir şəhər və kəndinin 24 saat fasiləsiz və keyfiyyətli içməli su ilə təmin edilməsi barədə tapşırıqlarına uyğun olaraq bölgələrdə genişmiqyaslı işlər görülür. Natiq qeyd etmişdir ki, hazırda “Azərsu” ASC-nin sifarişi ilə Azərbaycanın 24 şəhər və rayon mərkəzində, həmçinin 350-dən artıq kənddə su layihələri həyata keçirilir. Artıq Quba şəhərində işlər başa çatdırılmış və 10 şəhərə yeni mənbədən içməli suyun verilməsi təmin edilmişdir. Bu layihələrin icrası zamanı SCADA sistemləri tətbiq edilir, müasir laboratoriyalar yaradılır, müasir  texnoloji  avadanlıqlar quraşdırılır. Yeni infrastrukturu idarə etmək üçün peşəkar kadrların hazırlanması prioritet kimi müəyyənləşdirilmişdir. O, belə tədbirlərin rayon sukanal idarələrində çalışan işçilərin bilik və bacarıqlarının artırılmasına xidmət edəcəyinə əminliyini ifadə etmişdir.

Sonra Şamaxı, İsmayıllı, Ağsu və Qobustan sukanal idarələri əməkdaşlarının cəlb olunduğu təlimlərə start verilmişdir. Təlimlər  “Azərsu” ASC-nin müxtəlif fəaliyyət sahələrini əhatə edən peşəkar mütəxəssislər  tərəfindən  aparılır. Nəzəri biliklər əldə etməklə yanaşı, avadanlıq və qurğuların iş prinsipi ilə yerində tanış olmaq üçün təlim iştirakçılarının istehsalat sahələrinə  səfərləri təşkil olunur. Təlim müddətində iştirakçıların  asudə vaxtlarının səmərəli keçirilməsinə də xüsusi diqqət yetirilmişdir. Bu məqsədlə təlim iştirakçılarının bölgənin səfalı yerlərinə  ekskursiyaları təşkil ediləcəkdir. Xatırladaq ki,  “Regional təlim-inkişaf proqramı-1” layihəsi çərçivəsində ölkənin 7 regionunda təlimlərin keçirilməsi planlaşdırılır. Təlimlərə səhmdar cəmiyyətin  “Birləşmiş Sukanal” MMC-nin, bölgələrdə fəaliyyət göstərən  digər qurumlarının 8 vəzifə və peşə istiqaməti üzrə (kommersiya qrupu rəhbərləri və mühəndisləri, su kəməri təsərrüfatında nəzarətçilər, mühasiblər, kompyuter operatorları, ustalar, sahə rəisləri, təmirçi çilingərlər, kadrlar üzrə müfəttişlər) 926 işçinin cəlb olunması nəzərdə tutulmuşdur.

Mirbağır YAQUBZADƏ,

“Xalq qəzeti”