Heydər Əliyev adına Bakı neft emalı zavodunun (NEZ) 21 №-li ilkin emal qurğusu istismara verildikdən sonra mərhələlər üzrə aparılan təmir işləri qurğunun vakuum bölməsində davam etdirilmişdir.

“Trend” ARDNŞ-in rəsmi saytına istinadən məlumat verir ki, təmir zamanı vakuum bölməsində kolonların bütün daxili elementləri yeniləri ilə əvəz edilmiş, kolonun içərisində uzun müddət istismarda olan bütün paketlər təzələnmişdir. Bütün bunlar məhsulun keyfiyyət göstəricilərinin yüksəlməsinə və məhsulun çıxım faizinin artmasına səbəb olmuşdur. Vakuumyaradıcı qurğunun yenilənməsi isə emal dərinliyinin artmasına imkan vermişdir.

Bundan başqa, təmir müddətində forsunkalar yeniləri ilə əvəz olunmuşdur ki, bu da ekoloji mühitin qorunmasına, yanacaq və enerjiyə qənaətə imkan vermişdir. ED-AV-6 qurğusunun vakuum bölməsində təmir işləri başa çatmış və qurğu tam rejimlə istismara buraxılmışdır.