Mayın 26-da Bakıda Avropadaxili Vergi Administrasiyaları Təşkilatının (İOTA) İcraiyyə Şurasının 92-ci iclası işə başlamışdır.

İclası giriş sözü ilə açan İOTA-nın prezidenti, Serbiya Vergi Administrasiyasının baş direktoru Liliyana Kovaçeviç gündəlikdə duran məsələlərlə bağlı tədbir iştirakçılarını məlumatlandırmışdır. Qeyd etmişdir ki, Bakıda keçirilən İcraiyyə Şurasının iclasında İOTA-nın təşkilati-inzibati məsələləri, eləcə də İOTA-nın  növbəti Baş Assambleyasına hazırlıq işləri müzakirə ediləcəkdir.

Tədbir iştirakçılarını salamlayan vergilər nazirinin müavini Sahib Ələkbərov Azərbaycan Respublikası Vergilər Nazirliyinin dünyada mövcud olan ən uğurlu təcrübələrin Azərbaycanda tətbiq olunmasına xüsusi diqqət yetirildiyini, bu baxımdan İOTA-nın ən səmərəli bir platforma olduğunu vurğulayaraq, müstəqilliyini bərpa etdikdən sonra Azərbaycanın iqtisadiyyatının yüksək templərlə inkişaf etməyə başladığı, ölkəmizin vergi sistemində son illər aparılan islahatlar barədə qonaqlara məlumat vermiş və İcraiyyə Şurasının işinə uğurlar arzulamışdır.

İclasda İOTA-nın informasiya platformasının hazırlanması, 2013-cü ildə təşkilatın texniki və maliyyə hesabatlarının, qarşıdakı il üçün maliyyə büdcəsinin, təşkilat qarşısında duran bir sıra digər aktual məsələlərin müzakirə ediləcəyi nəzərdə tutulur.

Vaqif BAYRAMOV,

“Xalq qəzeti”