Dünyanın nüfuzlu “Forbes” jurnalı ilk dəfə olaraq rusiyalılar üçün biznes qurulması sahəsində ən cəlbedici keçmiş SSRİ şəhərlərinin reytinqini açıqlamışdır.

“APA-Economics”in məlumatına görə, bu reytinq siyahısında Azərbaycan paytaxtının da adı var.

Məlumata görə, siyahı hazırlanarkən əhalinin ödəniş qabiliyyətli olması və vergi yükünün az olması nəzərə alınmışdır. Bundan başqa, reytinq cədvəli tərtib edilərkən viza rejiminin sadəliyinə, rus dilinin statusuna, şirkətlərin qeydiyyatının qeyri-rezident olmasına da diqqət yetirilmişdir.

Reytinq siyahısına keçmiş SSRİ-nin 20 şəhəri daxil edilmişdir. Bu reytinq cədvəlində ilk onluğa Minsk (Belarus), Tallin (Estoniya), Vilnüs (Litva), Almatı (Qazaxıstan), Astana (Qazaxıstan), Riqa (Latviya), Kiyev (Ukrayna), Tbilisi (Gürcüstan) və Bakı (Azərbaycan) daxil edilmişdir.

Sonrakı yerləri Xarkov (Ukrayna), Bişkek (Qırğızıstan), Odessa (Ukrayna), Donetsk (Ukrayna), Dnepropetrovsk (Ukrayna), Kişinyov (Moldova), Düşənbə (Tacikistan), Daşkənd (Özbəkistan), Aşqabad (Türkmənistan) və Moskva (Rusiya) daxil olmuşlar.

Jurnal yazır ki, ölkə üzrə ayrılan kreditlərin 90%-i orta əmək haqqı 754 ABŞ dolları olan Bakının payına düşür: “Bu şəhərdə cinayətlərin sayı da olduqca aşağıdır. Belə ki, 2013-cü ildə 1000 nəfərə 4,5 cinayət qeydə alınmışdır”.