Azərbaycan Çexiya şirkətlərini ölkədə həyata keçirilən neft-qaz layihələrində yaxından əməkdaşlıq etməyə dəvət etmişdir.

“APA-Economics”in məlumata görə, bunu dünən Bakıda keçirilən Azərbaycan və Çexiya hökumətləri arasında keçirilən II qarışıq komissiyanın iclasında Azərbaycan Dövlət Neft Şirkətinin (ARDNŞ) vitse-prezidenti Elşad Nəsirov demişdir.

E.Nəsirov Çexiya şirkətlərini Türkiyənin İzmir şəhərində inşa olunan “Star” neft emalı zavodunun tikintisində iştirak etməyə dəvət etmişdir.

“Azərbaycan özü 2023-cü ilə qədər Bakıda yeni neft-qaz müəssisələrinin tikintisinə başlayacaq. Çexiya neft-qaz avadanlıqlarının istehsalçısıdır. Bu gün Azərbaycan Çexiyadan bu cür avadanlıqlar alır. Buna görə də  Çexiya şirkətləri bu yeni müəssisələrin tikintisində və neft-qaz avadanlıqları ilə təchiz olunmasında yaxından iştirak edə bilərlər”.

Bundan başqa, ARDNŞ rəsmisi TAP, TANAP layihələri barədə çexiyalı qonaqların məlumatlı olduqlarını bildirmiş və Çexiya şirkətlərini Azərbaycanın həyata keçirdiyi nəinki yerli, hətta beynəlxalq layihələrdə də iştirak etməyə çağırmışdır.

Çexiya nümayəndə heyəti təklifi qəbul etmişdir.