2014-cü ildə “Azerspace-1” rabitə peyki üzrə proqnozlaşdırılan gəlirlər təxminən 15 milyon dollar həcmində olacaq. Trend-in məlumatına görə, bu barədə cümə axşamı jurnalistlərə ölkənin rabitə və yüksək texnologiyalar naziri Əli Abbasov bildirmişdir.

Nazirin sözlərinə görə, ötən il bu göstərici 10 milyon dollar olmuşdur: “Biz ehtimal edirik ki, bu il ilk peyk proqramı üzrə kreditləri ödəmək üçün Maliyyə Nazirliyinin ayırdığı vəsaitlərdən istifadə edəcəyik, artıq 2015-ci ildə isə peyk gəlir gətirməyə başlayacaq”.

Nazir aşağı orbitli peykin tikinti layihəsi barədə də məlumat vermişdir. Onun sözlərinə görə, bu yaxınlarda Fransanın “EADS-Astrium” şirkəti “Azərkosmos” MMC-yə Azərbaycan üçün belə peykin tikintisi ilə bağlı öz təkliflərini təqdim etmişdir.

Artıq peykin tikintisi üzrə tender elan edilmişdir və bu günədək iştirakçıların “Azərkosmos” MMC-yə təqdim etdikləri təkliflərə baxılır və qiymətləndirilir: “Tender iştirakçılarının sayının artması ilə əlaqədar müddət daha bir ay uzadılacaq. Tenderin qalibinin adı yaxın vaxtlarda açıqlanacaq. Peykin tikintisinə 30 ay vaxt sərf olunacaq”.

İkinci rabitə peykinin buraxılışına gəlincə, Ə.Abbasovun sözlərinə görə bu istiqamətdə tender şərtləri hazırlanır. “Azerspace-2” rabitə peykinin 2017-ci ildə buraxılması planlaşdırılır.