Martın 11-də Azərbaycan Respublikası hökuməti ilə Koreya Respublikası hökuməti arasında kredit alınmasına dair razılaşma sazişi imzalanmışdır.

Azərbaycan Respublikasının Maliyyə Nazirliyinin mətbuat xidmətindən AzərTAc-a bildirmişlər ki, maliyyə naziri Samir Şərifovun və Koreya Respublikasının ölkəmizdəki səfiri Çoi Suk-İnin imzaladığı saziş “Pirşağı Çirkab Su Təmizləyici Qurğusu” layihəsinin tikintisi üçün Koreyanın İxrac-İdxal Bankının İqtisadi İnkişaf üzrə Əməkdaşlıq Fondundan 43,5 milyon ABŞ dolları həcmində kredit alınmasını nəzərdə tutur. Pirşağı Çirkab Su Təmizləyici Qurğusu vasitəsilə təmizlənəcək su kənd təsərrüfatı irriqasiyası üçün yenidən istifadə olunacaqdır.

İmzalanma mərasimində Azərbaycan Respublikası ilə Koreya Respublikası arasında ikitərəfli münasibətlərin bir çox sahələri əhatə etdiyi bildirilmiş, iqtisadi, mədəni, neft-kimya, enerji, nəqliyyat, turizm və digər sahələrdə əməkdaşlığın yaxşı səviyyədə olduğu vurğulanmışdır.