“Azərbaycanla Qazaxıstan arasındakı əlaqələr dinamik inkişaf edir. Bunu mütəmadi qarşılıqlı səfərlər təsdiq edir. Bu il həmçinin Qazaxıstan xarici işlər naziri Erlan İdrisovun Azərbaycana səfəri planlaşdırılır. Fevralın 20-də isə Qazaxıstan Milli Məclisinin sədri Nurlan Niqmatulinin Bakıya gələcəyi gözlənilir”.

APA-nın məlumatına görə, bunu dünən keçirdiyi brifinqdə Qazaxıstanın Azərbaycandakı səfiri Amangəldi Jumabayev demişdir.

 A.Jumabayev həmçinin iki ölkə arasındakı iqtisadi əməkdaşlığın perspektivlərindən danışmışdır. Azərbaycanla Qazaxıstan arasındakı ticarət dövriyyəsinin bir milyard dollara çatdırılmasının planlaşdırıldığını deyən səfir hazırda müvafiq göstəricinin 400 milyon dollara yaxın olduğunu bildirərək bunun mövcud potensiala cavab vermədiyini vurğulamışdır.