Bakı Biznes Mərkəzində Azərbaycanda İxracın və İnvestisiyaların Təşviqi Fondu (AZPROMO) tərəfindən Azərbaycanın investisiya və ixrac imkanlarının təqdimatı keçirilmişdir.
Tədbirdə BMT-nin Azərbaycandakı rezident əlaqələndiricisi, BMT İnkişaf Proqramının nümayəndəsi Fikrət Akçura, Azərbaycanın Ukraynadakı fövqəladə və səlahiyyətli səfiri Eynulla Mədətli və Pakistan İslam Respublikasının ölkəmizdəki fövqəladə və səlahiyyətli səfiri Əbdül Həmid iştirak etmişlər.
Təqdimatdan əvvəl qonaqlar Bakı Biznes Mərkəzində Azərbaycanın iqtisadi nailiyyətlərini əks etdirən sərgi ilə tanış olmuşlar.
Tədbirdə AZPROMO-nun prezidenti Adil Məmmədov Azərbaycan iqtisadiyyatı, ölkəmizin investisiya imkanları, AZPROMO-nun fəaliyyəti, yerli ixracatçılar və xarici investorlar üçün qurumun həyata keçirdiyi tədbirlər barədə məlumat vermişdir. Bildirilmişdir ki, Azərbaycan Respublikasının Prezidenti cənab İlham Əliyev tərəfindən uğurla davam etdirilən sosial-iqtisadi inkişaf strategiyası nəticəsində ölkəmizdə əlverişli biznes və investisiya mühiti yaradılmış, ixrac imkanları genişlənmişdir.
Təqdimatda BMT-nin iqtisadi qurumları ilə əlaqələrin inkişafı, xarici investorların Azərbaycanda həyata keçirilən layihələrdə fəal iştirakı ilə bağlı fikir mübadiləsi aparılmış, qonaqları maraqlandıran suallar cavablandırılmışdır.
Tədbir çərçivəsində Azərbaycan haqqında film də nümayiş etdirilmişdir.

Vaqif BAYRAMOV, "Xalq qəzeti"