Xəzərin Azərbaycan sektorunda yerləşən “Şahdəniz” qaz-kondensat yatağının işlənməsi üzrə konsorsiumun iştirakçıları adıçəkilən yatağın ikinci mərhələsi çərçivəsində  növbəti iri müqavilə imzalamışlar. Xatırladaq ki,  “Şahdəniz-2” layihəsi üçün müfəssəl mühəndis-layihələndirmə, layihənin idarə olunması və təchizat-tədarük işləri üzrə dəstək xidmətlərinin göstərilməsini nəzərdə tutan  bu müqavilə KBR şirkəti ilə bağlanmışdır.

Bu il dekabr ayının 17-də Bakıda “Şahdəniz” yatağının ikinci işlənmə mərhələsi üzrə imzalanmış yekun investisiya qərarından sonra gerçəkləşən sözügedən müqavilənin dəyəri 365 milyon dollardır. Məlumat üçün bildiririk ki, həmin müqavilə çərçivəsində nəzərdə tutulan işlərin 2014-cü ilin yanvar ayında başlanması və  2018-ci ildə sona çadırılacağı gözlənilir.

bp-dən aldığımız məlumata görə, müqavilə çərçivəsində bir-biri ilə körpü vasitəsilə birləşdirilən iki platformadan ibarət “Şahdəniz-2” layihəsi üzrə dəniz kompleksi üçün  mühəndis-layihələndirmə işlərinə dəstək, Səngəçal terminalında hər birinin gücü gündə 900 milyon kubfut olan iki qaz texnoloji xəttindən ibarət qaz emalı qurğusu və gündə təxminən 105 min barrel gücünə malik kondensat emalı qurğuları üçün quruda mühəndis-layihələndirmə işlərinə dəstək xidmətləri daxildir. Həmçinin, təchizat-tədarük xidmətlərinin göstərilməsi və layihə üzrə məlumatların idarə olunması üçün inteqrator da müqavilənin əsas detallarındandır.

Mirbağır YAQUBZADƏ,

“Xalq qəzeti”