Dekabrın 23-də Azərbaycan Respublikası Maliyyə Nazirliyinin Dövlət Xəzinədarlığı Agentliyinin 6 saylı Xəzinədarlıq İdarəsinin yeni inzibati binasının açılış mərasimi keçirilmişdir.

Maliyyə Nazirliyinin mətbuat xidmətindən AzərTAc-a bildirmişlər ki, mərasimdə iştirak edən maliyyə naziri Samir Şərifov rəmzi açılış lentini kəsərək inzibati binada yaradılmış iş şəraiti ilə tanış olmuşdur.

Məlumat verilmişdir ki, müasir standartlara uyğun inşa olunan binada normal iş fəaliyyəti üçün hər cür şərait yaradılmışdır. Binada bütün otaqlar kompyuter və ən müasir zəruri avadanlıqla təmin edilmişdir ki, bu da büdcə təşkilatlarına göstərilən xəzinə xidmətinin keyfiyyətini və operativliyini yüksəltməyə imkan yaradır. Qeyd olunmuşdur ki, 6 saylı Xəzinədarlıq İdarəsi qırxadək büdcə təşkilatına xidmət göstərir.

Açılış mərasimində çıxış edən nazir Samir Şərifov bildirmişdir ki, Prezident İlham Əliyevin rəhbərliyi altında uğurla həyata keçirilən iqtisadi siyasət nəticəsində ölkə miqyasında aparılan böyük tikinti-quruculuq işləri bütün sahələri əhatə edir. Nazir qeyd etmişdir ki, son illərdə Maliyyə Nazirliyi əməkdaşlarının iş şəraitinin yaxşılaşdırılması, eyni zamanda, nazirliyin tabeliyində olan qurumların ayrıca inzibati binalarla təmin olunması istiqamətində ciddi işlər görülmüşdür.

Kollektivi yeni inzibati binanın istifadəyə verilməsi münasibətilə təbrik edən S.Şərifov əmin olduğunu bildirmişdir ki, idarənin əməkdaşları qarşıya qoyulan vəzifələri daha yüksək səviyyədə həyata keçirəcəklər.