Xəzər dənizinin Azərbaycan sektorundakı “Şahdəniz” qaz-kondensat yatağının işlənməsinin birinci mərhələsi çərçivəsində illik qaz hasilatının həcminin 9 milyarddan 10,4 milyard kubmetrədək artırılması planlaşdırılmışdır.

Bu sözləri bp şirkətinin “Şahdəniz” yatağının işlənməsi üzrə vitse-prezidenti Al Kuk Bakıda keçirilən mətbuat konfransında demişdir.

Onun sözlərinə görə, yataqdan hasil ediləcək əlavə 1,4 milyard kubmetr qaz imzalanacaq yeni müqavilə çərçivəsində Azərbaycan Respublikası Dövlət Neft Şirkətinə (ARDNŞ) satılacaqdır.

A.Kuk qeyd etmişdir ki, yeni müqavilə hər iki tərəf üçün sərfəlidir və “Şahdəniz” layihəsinin reallaşdırılmasında yeni imkanlar açacaqdır.

Vitse-prezident bildirmişdir ki, yataqda qaz hasilatı 5 quyuda aparılır. “Şahdəniz” yatağı üzrə müqavilənin fəaliyyət müddətinin 2048-ci ilədək uzadılması çox vacibdir. Çünki biz yataqda uzunmüddətli kəşfiyyat işlərini planlaşdıra bilərik.

bp-nin vitse-prezidenti diqqətə çatdırmışdır ki, yataqda 3 sahə mövcuddur. Həmin sahələrdə seysmik işlərin aparılması nəzərdə tutulmuşdur. Yataqda kəşfiyyat işləri davam edir. Məqsəd məlumatların təkrar təhlilidir. Bu da öz növbəsində yataqda daha çox ehtiyatın ola biləcəyi barədə danışmağa imkan verir.

AzərTAc