Birləşmiş Krallığın rəsmi dövlət informasiya saytı “gov.uk”də “Şahdəniz-2” layihəsi üzrə yekun investisiya qərarının imzalanması haqqında məlumat dərc edilmişdir.

Məlumatda layihənin Avropanın enerji təchizatının müxtəlifliyini artırdığı, enerji təhlükəsizliyində böyük rol oynadığı və Britaniya ilə Azərbaycanının enerji sahəsindəki münasibətlərini daha da möhkəmləndirdİyi vurğulanmışdır. Məlumatda, həmçinin qeyd edilmişdir ki, Avropada bu dördüncü böyük təbii qaz dəhlizinin açılması strateji cəhətdən böyük əhəmiyyət kəsb edir və Xəzər qazının Avropaya gətirəcək “Cənub dəhlizi” layihəsinin reallaşması üçün mühüm bir addımdır. Layihənin, həmçinin minlərlə yeni iş yeri yaradacağı və Azərbaycandan İtaliyaya qədər boru kəməri boyundakı ölkələrə firavanlıq gətirəcəyi diqqətə çatdırılmışdır.

Məlumatda Böyük Britaniya və Şimali İrlandiya Birləşmiş Krallığının xarici işlər naziri Uilyam Heyqin yekun investisiya qərarının imzalanması mərasimində dediyi bu sözlər sitat gətirilmişdir: “Şahdəniz-2” layihəsi Azərbaycan, Birləşmiş Krallıq və ümumilikdə Avropa üçün mühüm hadisədir. Layihə Avropanın enerji təhlükəsizliyinin və rəqabətliliyinin təmin edilməsi üçün yeni bir mənbədir. Layihənin reallaşması Birləşmiş Krallıq ilə birgə 300-ə qədər firma üçün də faydalıdır. Birləşmiş Krallıq layihənin gerçəkləşməsində Azərbaycanın oynadığı əsas rolu yüksək qiymətləndirir”.

Məlumatın tam mətnini aşağıdakı linkdən oxumaq olar: https://www.gov.uk/government/news/foreign-secretary-welcomes-azerbaijan-gas-field-development

Orxan İSMAYILOV

AzərTAc-ın xüsusi müxbiri

London